Muggedätscher Alti Garde Fasnacht 2009

Sujet: 175 Joor gschiide - und immer noni zfriide!

Sujet: 175 Joor gschiide - und immer noni zfriide!

Z Basel an mym Rhyy
S isch achtzäädryssig glyy
D Stedter sinn halt arrogant
So dien sy muulen uff em Land.
Z Basel, z Basel, wänn nimm alli syy!
Uff der Landschaft isch me hässig
d Liebi fir die Stadt isch mässig,
d Bebbi sinn uff hoche Resser,
d Mainig isch: Eus giengtis besser
in Zuekunft, wenn miir ooni die
e Halbkanton cheu duurezieh!
Dr Urgrossbabbe Grollimund
sait: Z Basel sy si mollig rund
und miir in Aesch und Prattele
mien dääne d Ross nit sattele!
Der Gutzi Steffi, iire Chef
posuunt in Buebedorf denn bref:
Mir wei doch nümm dört aabe renne,
die Stadt söll jetzen aabebrenne!
Z Basel an mym Rhyy
Wänn die nimme syy!
Und denn bi der Hülfteschanze
Gitts ganz fuurchbaar uff e Ranze
Z Basel, z Basel, wänn nimm alli syy!
Sit sälbmool denn do drait sich d Wält
in baide Halbkanteen ums Gäld.
S wird ghändlet, s isch e woori Fraid,
um Schuele und em Lang sy Waid.
Au s Aenishänslis wäffele z Buckte:
In dääre Stadt sy nuur die Verruckte!
Em Lothringer Saresi in der Dalbe
ischs glych, wenn em Handschin syyni kalbe.
S schreyt der Heggedorn, dä Drümmel:
Die Merian si rammligi Lümmel!
Am Waldrand z Lauel steent der Gysi:
Au d Pryyswärgg die isch ämmel e Lyysi!
Z Lieschtel macht me grad e Gant,
vom Minsterschatz goot vyyl uss Land.
De muesch hit d Wält umrundere
zem d Heinrich-Schetz bewundere.
Z Basel an mym Rhyy
Wänn si halt nit syy!
D Stadt muess bluete mit em Gäld
D Kunschtschetz pfupfts ewägg in d Wält!
Z Basel, z Basel, wänn si halt nimm syy!

Au hittigsdaags isch me no gschiide
s herrscht immer no kai ächte Friide.
Vo Basel bis uff Rotheflue
gänn maischtens halt die Flotte Rue!
Bim Gäldsagg dien jo d Rammel penne
do hänn si denn der Bammel z renne.
Ins Stadttheater goot me gäärn
der Bebbi zaalt, vilicht au Bäärn.
Bi Balett do muess der Imhof schiile,
wott Stratosphäre-Ping-Pong spiile.
Näbem Zolli stiirbt der Birggewald,
Subväntionskirzige die wirgge bald!
Bim Kinderspittel wird wiescht bällt
au doo goots nuur um Macht und Gäld.
Iber d Mäss hyylt d Mangold z Buus:
Sii kimmeret nur s aige Huus.
Au d Ruumblaanig git ene z dängge,
jo nuur em Andere nyt schängge!
Und d Uni isch ene ganz suschpäggt
dert verkeere gryydigi Objäggt.
Anderi Rächnige, maint do d Frau Gass,
mache die , als miir in der vierte Klass.
Bim Dram so saits der Schittelryym-
haissts Byyljee jetz halt Rittelschyyn.
Es kaa sich kain im Schlappe halte,
so dien si z Lieschtel d Rappe spalte!
En Usswääg, schwiirig uss däm Sumpf:
Me nuumt, wenns guubt, isch allewyl Drumpf!
Z Basel an mym Rhyy
Will niemeds zfriide syy
Me loot soo gäärn die Andere lyyde
Und duet der Griff in Gäldsagg myyde!
Z Basel, z Basel, soll kai Friide syy!
Als gueti Bebbi-Glygge doo
isch glaar, mir dien fir d Stadt yystoo.
S sinn alli sänggrächt, ooni Gfasel
fir uns ischs Zäntrum glaar nur Basel!
ussTailand, Ettige, Buebedorf,
uss Hennef (Teutschland), Arisdorf
uss Gstaad, Birsfälden oder Bängge,
uss Interlagge, me wuurds nit dängge,
uss Haagedaal, Allschwil, Binnige,
uss Däärwyyl, Magde, die Innige,
uss Rhyfälde, Grällige, Leyme (France),
uss Muttenz, Lupsige, ganz in Trance
eb au e glai, glai Minderhait vo doo,
mir wänn als B a s l e r Glygge goo!
Z Basel an mym Rhyy
Soll drey Daag Friide syy!
D Fasnacht hilft ys uff e Wääg
Dermit sinn miir denn alli zwääg!
Z Basel, z Basel, soll jetz Friide syy!

D Ladäärnen uff em Minschterblatz und d Wäägen
und Requisiten in der Kasäärne sinn au dissjoor vom
Mäntig Zoobe bis am Mitwuch Zmidaag z bschaue.
www. Muggedaetscher.ch

Termin:

DO 6. Juni 2024 GV
VKB-Käller 20:00

DO 27. Juni 2024
Suimmer-Töörli-Grill
mit Stamm 19:00

DO 04. Juli 2024
Veloplausch 19:00

DO 11. Juli 2024
Summerstubete 19:00

DO 18. Juli 2024
Grilliere 19:00

DO 25. Juli 2024
Oobewanderig 19:00

MO 10. Mèèrz 2025 4:00 Uhr
bis
Do 13. Mèèrz 2025 4:00 Uhr
Fasnacht